Ephesians 5

APMA VAT YIGA YETƗ NGWULA

1Ngwuk Godna nɨmba ngwuk. Ngwuk kat woviyaguga tɨgandɨ. Ngi kat tɨga yetɨnda vla yetɨ ngwula. 2Kraist nɨma maawut yelavɨka tɨga nɨn kat tɨga kiyandɨ. Kiyanda vat tamba la Juda God kat kwunapmak kwinja nda vla tɨgandɨ. Tamba Juda God kat kwinja ndana njangu wutaa lɨga wandɨ. Apma vatna wun kat yingwa waa God wandɨ. Kraist nɨn kat nɨma maawut yelavɨka tɨnda vla nɨno nat nɨmba kat wupma nɨma maawut yelavɨka tɨgiyanɨn.

 3Sɨk yambɨsɨk yiga kavle vat yiga nat nɨmbana nda klavat walɨnja vak ke yingw 4Kavle kwundi, nat nɨmba kat kwusɨsɨlɨgan ngambulɨnja kwundi, njɨka walɨnja kwundi ngwuk ke wangwa. God kat mɨna apma kwundi ngambuga ndɨ kat sɨvu kɨga alɨ ngwula. 5Kɨta nda vɨngwangat wowun. Sɨk yambɨsɨk yilɨga nɨmba kavle vat yilɨga nɨmba, nat nyana nda klavat walɨga nɨmba Godno Kraist ɨga lɨga kava ana wuleigiyandi. Ndɨ kɨta nyan nat nɨmbana nda klavat yelavɨka tɨndeyan kavle waagan kwunatɨgiya nyan vla tɨgiyandɨ.

 6Wan kavle vat yingweyan God ngwuk kat ana sɨgiyandɨ waa walɨga nɨmbana nyaangɨt ke wukngwa. Ngwuk kat woseka walɨgandi. Ndɨna nyaangɨt wupmak kat kai walɨga nɨmba ndɨna nyingi maawupmba tɨga ndi kat sɨgiyandɨ. 7Kɨndi nɨmba kavle nyaangɨt woseka waa yetɨga nɨmba ndi. Ndinogwinana ke yetɨngwa. 8Ngwuk tamba kulun wala la kava ta nɨmba vla tɨngwuk. Mbambala tamba njambwi nyana nɨmba tɨgangwuk. Ngwuk kemba lɨga kava tɨga nɨmba vla tɨgangwuk. Kembaga lɨga kava tɨga nɨmba apma vapmba yetɨgandi. Ngwulo wupma apma vat yetɨ ngwula. 9Kemba kavamba tɨga vla apma vat yetɨga nɨmba ndi kavle vat kwagalalaa apma vat mɨna yetɨga woseka ana walɨgandi. 10Njambwi nyan woviyaguga tɨnda vak kat kwaka alɨ ngwula. 11Kulun wala lɨga kavamba tɨga kavle vat yetɨga nɨmbanala ke lɨngwa. Yilɨnja kavle vat kwo vatna. Ndi kat wan apma vat vɨsɨmogwi ngwula. 12Pogwuga yilɨnja kavle vat kat wun ana mbuk kiyowun. Mbupmak kat wuna mbangɨ wup yigandɨ. 13Pogwula kavle vapmba yetɨga nɨmba apma vat yiga yetɨneya vak kat vɨlaa yelavɨkiyandi. Nɨn kavle vat yiga yetɨlɨganɨn waa yelavɨkiyandi. 14Nɨn kavle vak yiga yetɨlɨganɨn waa yelavɨtaa kavle vak kwagalalaa apma vak yetɨgiyandi. Tamba la nyan lavu nyingamba ndɨno wupma pɨlɨwutndɨ.

  • Sɨndukwalɨga nyan laap mɨla. Kiya nyano laap
  • mɨla. Laapmɨn maa Kraist yalaa apma vat mɨn kat
  • sɨmogwi kiyandɨ.
waa tamba pɨlɨwutndɨ.

 15Ngwuk sɨmblan ke yetɨngwa. Apma maawut yelavɨka yetɨ ngwula. Maawut yelavɨtapman yetɨga nɨmba vla ke yetɨngwa. 16Kan mbambala tɨna njɨmbla nɨma sakwat kavle vat tɨgandɨ. Ngi kat tɨga nɨma njɨvwa kwuka apma vapmba yetɨ ngwula. Ke kwo yetɨngwa. 17Ngwuk sɨmblan ke yetɨngwa. Njambwi nyan woviyaguga tɨnda vak vɨlaa wungi vapmba yetɨ ngwula.

 18Nɨma ngu nɨma sakwat ke kɨngwa. Nɨma sakwat kɨngweyan tungwengwan yiga kavle yigiyangwuk. Godna waagan ngwukkat nɨmamba wuleiga ngwula mbangɨ tavindeyan wovuna. Apma vatna. 19Godna sɨ katsovat vi mbangu veiga Godna nyaangɨt tɨga mbangu kwundi nglasɨ kwundi, wama kwundi awat sowat waga alɨ ngwula. Wan apma vatna. God kat ndɨ kat wama kwundi nglasɨ kwundi ndɨ kat katsovat ngambu ngwula. 20Nɨna nyaek God nɨn kat yinda nda kat yelavɨtaa ndɨ kat sɨvu agɨ ngwula. Nɨna njambwi nyan Jisas Kraistna sɨ waga ndɨ kat sɨvu agɨ ngwula.

NDU TAAGWANA NYANGƗT

21Kraist nɨna njambwi nyana. Nɨn mat nyangu vla lɨganɨn walaa nat nɨmbana nyaangɨt awuk ngwula. 22Njambwi nyana kwundi wutɨna vak vla ngwut taagwa ngwutno ngwula lana kwundi awuk ngwula. 23Kraist ndɨna mbaapma nɨmbana njambwi nyanat tɨnda vla ndɨno wupma ndu ndɨna taagwana njambwi nyanat tɨgandɨ. Kraist ndɨna mbaapma nɨmba kat kwunatndɨ maa ndɨna mbangɨ vla tɨgandi. 24Nɨn Kraistna mbaapma nɨmba ndɨna kwundi wutɨna vla ngwulo taagwa wupma ngwula lana kwundi awuk ngwula.

 25Kraist ndɨna mbaapma nɨmba kat nɨma maawut yelavɨka tɨga ndi kat tɨga kiyandɨ. Ndi kat nɨma maawut yelavɨka tɨnda vla ngwukndungwutna taagwakat wupma yelavɨka alɨ ngwula. 26Ndɨ Kraist ndɨna mbaapma nɨmba kat tɨga kiyandɨ maa ndɨna nyaangɨt wutaa ngu yagundi. Ngu yagundi, ndina kavle vak ngɨlɨndɨ. Ngɨlɨndɨ maa Kraist ndi kat kwutaa wenga nda vla God kat kwindɨ. 27Kraist ndɨna mbaapma nɨmba kwunataa ndu taagwa kat klanja vla Kraist wupma ndi kat klandɨ. Ndi kat Kraist kwunatndɨ maa ndi apma vat mɨna tɨgandi. Ndi yigin taagwa vla tɨgandi. Mbangɨ kɨsɨ tapman nglambi tapman tɨga nyangu vla tɨgandi. Apma vat mɨna tɨgandi. 28Ngwut ndu avla ngwula mbangɨ kwunakngweya vak vla ngwutna taagwana mbangɨ wupma kwunak ngwula. Ngwut kɨta mbangɨ nda vla tɨgangwuk. 29Nat nyan ana ndɨna mbangɨ avla kavle yilɨgandɨ. Ndɨna mbangɨ kwunaka kɨgɨnda kwilɨgandɨ. Kraist wupma ndɨna mbaapma nɨmba kat kwunatɨgandɨ. 30Ndɨ ndɨna mbaapma nɨmba nɨn. 31Ndɨ tamba la nyan God waa nyaangɨt wutaa ndɨ lavu nyingamba tamba pɨlɨwutndɨ.

  • God wandɨ maa kɨta nyan ndɨna nyaek nyime
  • kwagalalaa ndɨna taagwonana yetɨgiyandɨ. Mbɨk
  • ngɨni kɨta nda vla tɨgiyambɨk
waa tamba lavu nyingamba pɨlɨwutndɨ. 32Wan pɨlɨwuta nyaangɨtna angwa vak ngilɨga. Kraist ndɨna mbapma nɨmba kɨtamba yetɨnja vak kat yelavɨtaa lavu nyingamba pɨlɨwutndɨ. 33Wan pɨlɨwuta nyaangɨtna angwa vat nat kɨta ligandɨ. Ndu taagwakat nɨma maawut yelavɨka lavu nyingamba pɨlɨwutndɨ.
Copyright information for IAN